رۆژنامەنووسان و میدیاكارانی خۆشەویست
ساڵیادێكی دیكەی رۆژنامەگەری كوردی و دەرچونی یەكەمین رۆژنامەی (كوردستان) بەر 118 ساڵ لە تاراوگە، لە هەلومەرجێكی تایبەتدا بەڕێوەدەبەین، كە كوردستان و گەڵانی دیكەی ناوچەكە بە قۆناغی گرنگی مێژوویی و ئابوری و سیاسیدا تێپەڕدەبن.
گەلی كوردستان بەبروابوونی بە بەدەستهێنانی مافەكانی و بەردەوام بوونی لە تێكۆشان و قوربانیدان، ساڵانێكە ئەو قۆناغەی تێپەڕاند كە هەوڵی سڕینەوەی دەدرا، (رۆژنامەی كوردستان) و (میقداد مەدحەت بەدرخان) و ئازادیخوازان و گەلی كوردستان بە بڕواوە ئەركە قورسەكانیان لە ئەستۆگرتبوو، بەدەركردنی رۆژنامەیەك لەو سەردەمەدا، وەڵامی ئەو دژواریی و چەوساندنەوەیان دایەوە و شانازییەكی گەورەیان بۆ خۆیان و گەلی كوردستان تۆماركرد، كە ئێستا ئێمە درێژەی پێدەدەین، چونكە پێمانوایە باشترین وەفا بۆیان درێژەپێدانی رێگەكەیانە.
تێكۆشانی ئەوان، وەڵام بوو بۆ دوژمنان، لەلایەكی تریشەوە بەردەوامی و ئیدامەدانی خەباتی سیاسی و میدیایی و مەدەنی خەڵكی كوردستانیش درێژەی ئەم رێنسانسە مێژوویی و نیشتیمانییە بوو لەسەردەم و قۆناغە جیاوازەكاندا، تا دەگات بە ئێستا و بە هەوڵی دەستەبەركردنی دیموكراسی لە هەرێمدا و گەیشتن بە دەسەڵاتی چوارەم.
سەرەڕای ئارمان و ئامانجە سیاسییەكان، دەستكەوتە گەورەكانی بواری رۆژنامەگەری و چاپەمەنی و میدیا لە ناو سەدان دەستكەوتدا، جێگە و پێگەی گەورەیان گرتووە و بوونەتە داینەمۆی بەرهەمهێنانی سەدان كەناڵی میدیایی جۆراوجۆر، كە هەڵگری ئایدیا، ئایدۆلۆژیا، رەنگ، روخسار و ناوەڕۆكی جیاواز جیاواز لە چەپ و راست، نەتەوەیی و نیشتمانی، ئازادو لیبڕاڵ و رادیكاڵ بە ئازایانە و ئازادانە، بێ هیچ چەشنە سانسۆرو رێگرییەك گوزارشت لە خواست، فكر، بیرو بۆچونەكانیان دەكەن، لەگەڵ بوونی چەند تێبینییەكیش لە سایەی فەراهەمكردنی ئازادی راگەیاندن، عەقیدە، بەیان و بونیادی فەزای دیموكراسی، كۆمەڵگەی مەدەنی و رێكخستنی كار و ئەجێندایان لە چوارچێوەی یاسا بەركارەكانی هەرێم و یاسای كاری رۆژنامەنوسی سەندیكای رۆژنامەنوساندا، كاری خۆیان دەكەن.
هەموو ئەو دەستكەوتانەی كە لە رابردوودا بەدەستهاتوون بە هەوڵ و ماندووبونی ئەوانە بەرهەمهاتووە، كە خەباتیان لەو پێناوەدا كردووه و بڕوایان بە بەرجەستە بوونی ئازادی و دیموكراسی كۆمەڵگەیەكی بێ سانسۆر هەبووە، هەرگیزیش منەتیان بە سەر كەسدا نەكردووە و بە ماف و هەقی رەوای خەڵكی كوردستان و گەلان و پێكهاتەكانی دیكەی زانیوە، ئەوەشی كە بۆی نەكراوە دژواری بارودۆخەكە و نەیارانی ئەزمونی هەرێم و رێگەنەدان بووە، بەڵام هەرگیز نە كۆڵی داوە، نە بۆ تەواوی ئەو ئارمان و پرۆسیسەشی پاشەكشە دەكات تادەگاتە بەدیهێنانی هەموو ماف و ئازادییە كەسییەكانو تەواوی ئازادیی سیاسی و كۆمەڵایەتی و ئاینیەكانیش، كە خۆی لە مافی چارەی خۆنوسین و بەدیهێنانی ئاواتی لە مێژینەی هەموو گەلانی كوردستان بە دامەزراندنی كیان و دەوڵەتی سەربەخۆی كوردستان بەرقەرار و تەواو دەبێت.
بەشێكی زۆری میدیاكان و میدیاكارانی كوردستان، خەمخۆری ئەم خەون و چەمكانە بوون، ئەمەش شایستەی رێزگرتن و هەستكردنە بە بەرپرسیارێتی و ئەخلاقی كاری پیشەیی لە چوارچێوەی ئیتیك و پەیماننامە نێودەوڵەتییەكاندا.
رۆژنامەنوسانی كوردستان
118 ساڵەی رۆژنامەگەری لە هەموو قەڵەمە خەمخۆرەكانی ئەم بوارە و هەنگاوەكانیان پیرۆز دەكەین، چونكە ئەوە ئێوەن كە رێبازو رێچكەی سەرقافڵكانتان گرتووە، ئاڵای ئەم بزوتنەوە رۆشنگەر و مرۆڤدۆستی و نیشتیمانییەتان هەڵگرتوە و دەتانەوێت بیگەیەننە لوتكەی سەركەوتن.
سەروەری گەورەمان لە رێگەی نوسین و "را" دەربڕین و بیروبۆچون و بە بەرپرسیاریەتییەوە، لە رێگەی كەناڵەكانی میدیاوە خوڵقاندووە، بەڵام هەرگیز نەمانوتووە و نامانەوێت لەسەر خەرمانی دەستكەوت و بەهای گرنگ و دیموكراسیانە وچانبدەین، بەڵكو جەسورانەتر دێینە مەیدان بۆ بەئامانج گەیاندنی مافەكانی گەلانی كوردستان بە مافە پیشەییەكان و رۆژنامەنووسانیشەوە، چونكە هیچ دوو دڵ نین و یەقینمان هەیە، ئەم هەوڵانەی ئێوە و ئێمە و پێكهاتەكانی دیكەی سیستمی سیاسی دەڕژێنە نێو بەهاو ئامانجەكانی گەلی كوردستان.
میدیاكارانی نیشتیمانپەروەر و ئازادیخواز
تادێت كاریگەرییەكانی میدیا و رۆژنامەوانی جیهانی لە هەرێمی كوردستان شوێنی خۆی باشتر دەگرێت، بەڵام هێشتا نەبۆتە دەسەڵاتی چوارەم، هێشتا مافە پیشەیی و مادییەكانی رۆژنامەنوسان وەكو پێویست دەستەبەرنەكراوە، هێشتا پێشلكارییەكان (كەم و زۆر) جێگەی نیگەرانین، هێشتا كاری رۆژنامەنوس بە پیشەیی نەناسێنراوە و یاسای ژمارە (35)ی ساڵی 2007 وەكو پێویست جێبەجێ نەكراوە، هێشتا رۆژنامەنوسانی كوردستان وەكو هاوپیشەكانیان لەوڵاتانی پێشكەوتووی دیموكراسی بەشدارنین لە بڕیاردان و پرس و راكردن و دۆزینەوەی چارەسەری گونجاو بۆ قەیرانە سیاسی و ئابوری و كۆمەڵایەتیەكان، كە دەتوانن رۆڵی كاراو ئەكتیڤ لەم بوارو هەلومەرجەدا بگێڕن، كە ئەركی حكومەت و دامودەزگاكانیەتی وەڵام بەم (هێشتایانە) بدەنەوە، هەروەها قەیرانی دارایی كاریگەری گەورەی لەسەر ژیانو گوزەرانی میدیاكاران داناوە، ئەمەش بەشێكە لەهەوڵەكانمان و هانمان دەدات زیاتر دەست بەپیشەكەمانەوە بگرین، داوای باشكردنی ژیان و گوزەرانی رۆژنامەنووسان بكەین، هانی حكومەت و لایەنە پەیوەندیدارەكان بدەین، كەبەپێی رێوشوێنێكی گونجاو هاوكاری مادی بۆ دەزگا و كەناڵەكانی میدیای نیشتمانی بڕیاربدات، بە لەبەرچاوگرتنی رۆڵ و كاریگەری رۆژنامەنووسان و میدیا لەسەر تەواوی پرۆسەی سیاسیو خەباتی نیشتمانیمان.
رۆژنامەنووسانی بەڕێز
سەندیكای رۆژنامەنوسانی كوردستان لەدروستبوونییەوە تا ئێستا و لەداهاتوشدا بە كار و ئەركی پیشەیی و سەندیكایی و نیشتیمانی خۆی دەزانێت، پشتیوانی لەچارەسەری ئەو كەم و كوڕیانە بكات، داكۆكی لە ماف و ئازادییەكان و ئاواتەكانی ئێوە بكات، ئەگەرچی كەمی نەكردووە، بەڵام بڕوامان وایە، هێشتا ئەرك و كاری زۆرتری لەم پێناوەدا ماوە، بۆیە بۆ دەستبەركردنی هەموو ئامانج و هیواو خەونەكانی ئێوە، دەبێت دەستی هاوپشتی و هاوپیشەیی بۆ سەندیكا درێژ بكەن، دیالۆگ و گفتوگۆی پیشەیانە بكەین و كەم و كوڕییەكان دەستنیشان بكەین و بەهەموومان شان بدەینەبەر چارەسەركردنیان و لە پێناو گەیشتن بە هەموو مافەكانمان، چونكە دروستبوونی سەندیكا هەر لەبنەڕەتەوە ئەركێكی سەرەكی هەبووە، كە ئەویش كۆكردنەوەی هەموو رۆژنامەنوسانی كوردستانە و لەم پێناوەشدا بیرۆكەی دروستبوونی فیدراسۆنی رۆژنامەنووسانی بۆ هەر چوار پارچەی كوردستان و رۆژنامەنوسانی پێكهاتەكانی دیكە لەناو سەندیكادا و خزمەتكردنیان بەدابینكردنی ماف و داخوازییەكانیان، بۆیە دەبێت هەمووتان بێنە مەیدان و پشتگیری لە داواكانی خۆتان بكەن، كە سەندیكا نوێنەرایەتی هەمووان بكات.
رۆژنامەنوسانی خاوەن قەڵەم و بە ویژدان
ئەركی هەموومانە لەسەر ناعەدالەتی، گەندەڵی، دیاردە دزێوەكان بنوسین و بەگژیدا بچینەوە، ئەركی هەموومانە پێداگری لەسەر وەستانی پێشلكارییەكان بكەین و داوای سزادانی ئەوانە بكەین، كە بەرپرسن لە تیرۆری رۆژنامەنوسان و لێدان و سوكایەتی پێكردنیان.
بەهەمانشێوە ئەركی هەموومانە لەسەر خاڵە باشەكان بوەستین پارێزگاری لە ئازادییەكان - دیموكراسی كوردستان بكەین، ئەركی هەموومانە پێشكەوتنە گرنگەكانی ئەم وڵاتە ببینین و رێزیان لێبگرین، بۆ ئەمكارە، خاڵی گرنگ، هەنگاونانە بۆ بەرهەمهێنانی میدیایەكی نیشتیمانی كە هەڵگری خەسڵەتی فەراهەمكردنی ئازادی، بێلایەنی، پیشەیی، نیشتمانی و نەتەوەییە لەپاڵ پیادەكردنی ئیتیك و یاساكانی رۆژنامەگەری، وەكو چۆن لە دوو ساڵی رابردوودا، ئەگەرچی درەنگ كەوتین، بەڵام بەكردار دژی گروپی تیرۆریستی داعش هەنگاومان هەڵگرت و هەمووشمان شانازی ئەو ئەركە مێژووییەمان پێبڕا، لەپاڵ هێزی پێشمەرگەی كوردستاندا، كە هەمان رێچكەی نیشتمانی بەدرخانییەكان بوو لە سەدەی رابردوودا، لەم بوارەشدا ، لەساڵیادی 117ـەدا سەندیكا مانیفێستی رۆژنامەنووسانی راگەیاند بۆ دیاریكردین مافو ئەركو دەستەبەری ئازادییەكانو بەرپرسیارێتی تەواوی رۆژنامەنووسان بەبێ جیاوازی.
رۆژنامەنووسی خۆشەویست
هەموومان بەداكۆكی لە ماف و ئازادییەكانی خەڵكی كوردستان سەركەوتوو دەبین، بەدەر لە جیاواز لە بنەما فكریی و ئیدیۆلۆژی، سیاسی و مەزهەبییەكانی كوردستان، كه خاڵی بەهێزی كاركردنمان و سەركەوتنەكانمانە، با روخسار، ئاواز، رەنگ و رووی جیاوازمان هەبێت، با بیركردنەوەمان تەواو جیاواز بێت، گرنگه ئەركە بهراییهكانمان لە پێشەوەی ئەم چەمك و جیاوازیانە بێت، هەمووشتان ئەوە ئەزانن، ئەم دەستكەوتە رۆژنامەوانییە بەو جیاوازییە زۆر و زەبەندانەوە، خاڵی بە هێزی سیستمی سیاسی هەرێم و پڕۆسەی دیموكراسی كوردستانە.
ڕۆژنامەنووسانی بوێرو ئازادیخواز
دڵنیاین ساڵی داهاتوو كە یادی 119 ساڵەی رۆژنامەگەری كوردی دەكەینەوە، بووینەتە خاوەنی دەستكەوتی گەورەتر و دەزگا و دامەزراوەی نیشتیمانی و پڕۆفیشناڵتر و بەهێزتر، كە هەڵگری گوتاری نیشتمانی، پیشەیی رۆژنامەوانییە، كە ئەوەش هەم خەمی ئێمە و ئێوەشە، بەهیواین ساڵی داهاتوو لەگەڵ یادكردنەوەی 119 ساڵەی رۆژنامەگەری، قەیرانە ئابوورییەكان كۆتاییان پێ بێت ململانێی سیاسییەكان بچنەوە سەر سكەی دیالۆگ و چارەسەری ریشەیی، چونكە لە خزمەتی هەموو خەڵكی كوردستاندایە و لە پێشەوەشیان رۆژنامەنووسان و میدیاكاران.
بەرز و پیرۆز بێت یادی رۆژنامەگەری كوردی.
ئەنجومەنی سەندیكای رۆژنامەنووسانی كوردستان
22ی نیسانی 2016